Flugeldum að verðmæti milljón króna stolið í nótt

Brotist var inn í húsnæði björgunarsveitarinnar Bróðurhandar undir Eyjafjöllum í nótt og flugeldum stolið. Söluverðmæti flugeldanna er talið nema um einni milljón króna.

„Við seljum bara í einn dag og sem betur fer vorum við búnir að ná okkar söludegi. En það var fullt af flugeldum eftir,“ segir Einar Viðar Viðarsson, formaður Bróðurhandar, í samtali við mbl.is.

Hann segir að hurð á húsnæði björgunarsveitarinnar hafi verið spennt upp með kúbeini einhvern tímann á milli klukkan 22:30 í gærkvöldi og 9:30 í morgun.

Þjófarnir virðast einungis hafa haft áhuga á flugeldum því engu öðru virðist hafa verið stolið.

Stutt er síðan flugeldum var stolið af Hjálparsveit skáta í Kópavogi. Lögreglan var þó fljót að finna þýfið í því tilviki og skila því aftur til réttmætra eigenda.

Frétt af mbl.is

Flugeldum fyrir milljónir stolið af björgunarsveit

Frétt af mbl.is

Flugeldar endurheimtir og fjórir handteknir

Samkvæmt heimildum mbl.is var reynt að brjótast inn í húsnæði Björgunarsveitar Landeyja í nótt. Ummerki á húsnæðinu gáfu til kynna að reynt hefði verið að spenna upp hurð á húsnæðinu með verkfæri. Engu var þó stolið eftir því sem mbl.is kemst næst.

• Blogga um frétt