Spár gera ráð fyrir mikill rigningu eða slyddu um allt land í kvöld og á morgun en við slíkar aðstæður er hætt við vatnstjóni þegar leysingar- og regnvatn þarf að komast leiðar sinnar. Almannavarnadeild ríkislögreglustjóra hvetur fólk til að ganga úr skugga um að fráveitukerfi virki sem skyldi, hreinsa frá niðurföllum o.þ.h. til að forðast vatnstjón.
Einnig kemur fram á Facebook-síðu almannavarnadeildarinnar að flughálka geti myndast þegar blotnar á svelli eða þjöppuðum snjó.
Þegar einnig er hvass vindur geta aðstæður til aksturs verið mjög varasamar.
Veðurfræðingur Vegagerðarinnar segir að fólk ætti í lengstu lög að forðast ferðalög í nótt og fyrramálið, sérstaklega á langleiðum og yfir fjallvegi.
Appelsínugul viðvörun tekur gildi á Breiðafirði, Vestfjörðum, Ströndum og Norðurlandi vestra, Norðurlandi eystra og miðhálendinu seint í kvöld og spár gera ráð fyrir suðaustanstormi með rigningu eða mikilli slyddu og hlýnandi veðri.
Auk þess taka gular viðvaranir gildi á höfuðborgarsvæðinu, Suðurlandi og Faxaflóa í kvöld.