Vinnuslys varð í vikunni um borð í bát þegar verið var að lagfæra leguhringi. Sá sem að því vann missti slípirokk með þeim afleiðingum að hann fékk djúpan skurð í fingur.
Hann var fluttur í fyrstu höfn, sem var Keflavíkurhöfn, að því er segir í tilkynningu frá lögreglunni á Suðurnesjum. Við höfnina biðu hans sjúkraflutningamenn sem hlúðu að honum og fluttu hann síðan á Heilbrigðisstofnun Suðurnesja.
Þá handtók lögreglan á Suðurnesjum ökumann í vikunni, sem ók með aðra bifreið í dráttartaug á Reykjanesbraut, vegna gruns um að hann æki undir áhrifum fíkniefna. Sýnatökur á lögreglustöð sýndu jákvæðar niðurstöður á neyslu amfetamíns.