Það getur tekið fólk sem greinist með bótúlisma vikur og jafnvel mánuði að jafna sig og þurfa þeir jafnan öndunarvél eða aðra öndunaraðstoð á meðan eitrunin gengur yfir.
Þetta segir Þórólfur Guðnason sóttvarnalæknir í samtali við mbl.is. Hinn 18. janúar var bótúlismi staðfestur hjá íslenskum karlmanni á Norðurlandi, en fyrstu einkenna varð vart 12. janúar og var eitrunin staðfest tæpri viku síðar.
Eitrunarinnar hefur ekki orðið vart hjá fleirum, en að sögn Þórólfs berst hún ekki manna á milli heldur þarf að neyta matvæla sem innihalda bakteríuna Clostridium botulinum. Nái hún að vaxa í matvælum veldur hún alvarlegum veikindum með lömunum sem leitt geta til dauða.
Uppruna eitrunarinnar er ákaft leitað af Matvælastofnun, heilbrigðiseftirliti sveitarfélaga, sóttvarnarlækni og sýkla- og veirufræðideild Landspítala, en að sögn Þórólfs er ekki talið að upprunann megi finna í matvælum í dreifingu.
„Við göngum út frá því að þetta sé ekki í víðari dreifingu, það væri mjög ólíklegt,“ segir Þórólfur. Niðurstaðna úr rannsóknum á matvælunum er ekki að vænta fyrr en í fyrsta lagi eftir viku, en þær fara fram erlendis.
Bótulismi er mjög sjaldgæf eitrun sem hefur aðeins greinst hér á landi þrisvar sinnum, fyrst árið 1949 þegar fjórir menn veiktust eftir neyslu súrsaðs dilkakjöts, aftur 1981 þegar fjögurra manna fjölskylda veiktist og síðast árið 1983 þegar móðir og barn veiktust eftir að hafa borðað súrt slátur sem bakterían fannst í.
Að sögn Þórólfs er ekki vitað hvernig fór fyrir þeim sem veiktust árið 1949, en enginn lést í síðari tveimur tilvikunum snemma á níunda áratug síðustu aldar.
„Fólk nær sér á löngum tíma. Hins vegar getur þetta verið erfiður sjúkdómsferlill, fólk lamast og þarf jafnvel að vera í öndunarvél og öndunaraðstoð á meðan þetta gengur yfir og það er margt sem getur gerst.“