Agnes M. Sigurðardóttir, biskup Íslands, skipaði fyrir nokkru starfshóp sem kanna skyldi möguleika á því að kirkjan kæmi á fót dagsþjónustu fyrir fólk sem er á götunni. 

Starfshópurinn skilaði tillögum til biskups ásamt kostnaðaráætlun. Hópurinn lagði til að í fyrstu yrði opnað dagsetur fyrir heimilislausar konur og yrði það opið alla daga ársins frá 11-17.

Boðið yrði upp á heita máltíð í hádeginu og kaffihressingu síðdegis, að því er segir á vef þjóðkirkjunnar.

Þar segir jafnframt, að kirkjuráð hafi tekið málið fyrir og samþykkti á fundi sínum 11. desember að koma skyldi upp dagsetri. Samþykkt var að vinna áfram með málið og liggur fjárveiting til verkefnisins fyrir á fjárhagsáætlun þjóðkirkjunnar fyrir árið 2020.

Tekið er fram að málið er enn í vinnslu hjá starfshópnum.

Hópinn skipa þau Ragnheiður Sverrisdóttir djákni, sr. Hjalti Jón Sverrisson og Vilborg Oddsdóttir, félagsráðgjafi hjá Hjálparstarfi kirkjunnar. Sr. Hreinn S. Hákonarson, fyrrverandi fangaprestur, er hópnum til ráðuneytis.

• Blogga um frétt