Kyrrsetningarmál Wikileaks aftur til héraðsdóms
Setja bókamerki
Landsréttur hefur fallist á kröfur Datacell ehf. um ómerkingu tveggja úrskurða héraðsdóms frá því í nóvember og desember, í málum þar sem meðal annars er deilt um 540 milljóna króna kyrrsetningargerð vegna greiðslugáttar sem Datacell hélt utan um fyrir Sunshine Press Productions ehf., rekstrarfélags Wikileaks.
Forsaga málsins er sú að þessari greiðslugátt, sem Valitor annaðist, var lokað af greiðslumiðlunarfyrirtækinu. Valitor féllst á það í fyrra að greiða fyrirtækjunum tveimur 1,2 milljarða króna í bætur fyrir að slíta samningum um greiðslugáttina, en síðan þá hafa staðið yfir lagadeilur á milli fyrirtækjanna tveggja um hvernig skuli skipta þeim fjármunum.
Stuttu eftir að Valitor samþykkti að greiða bæturnar fór Datacell fram á kyrrsetningu þar sem fyrirtækið taldi sig eiga rétt á stærri hluta fjárhæðarinnar og 540 milljónir króna voru kyrrsettar af sýslumanni í júlí í fyrra.
Datacell höfðaði tvö mál, sem báðum var vísað frá Héraðsdómi Reykjavíkur, en í öðru þeirra krafði fyrirtækið SPP um greiðslu þessara 540 milljóna. Landsréttur hefur nú ákveðið að málin skuli tekin fyrir að nýju í héraðsdómi og krafa Datacell skuli tekin fyrir þrátt fyrir að farið hafi verið fram á endurupptöku kyrrsetningarinnar af hálfu SPP. Enn sér ekki fyrir endann á deilunni um skiptingu milljónanna.
Sveinn Andri Sveinsson, sem áður var lögmaður beggja fyrirtækja í deilunni við Valitor en er nú einungis lögmaður SPP og tengdra aðila, segir við mbl.is að nú bíði hann þess að málsaðilar verði boðaðir fyrir héraðsdóm.
Hann kvaðst nokkuð undrandi á því að málin hefðu verið tekin upp að nýju, sérstaklega málskot Datacell á ákvörðun sýslumanns um endurupptöku kyrrsetningar. Með niðurstöðu sinni sé Landsréttur nánast að segja að héraðsdómur hefði átt að „hafa vit fyrir sóknaraðila málsins“ og „hysja upp um hann“, en málskoti Datacell var vísað frá héraðsdómi á þeim grundvelli að gerðarþolar kyrrsetningargerðarinnar sem var til umfjöllunar hefðu verið tveir, Sunshine Press Production og tengdur einstaklingur að auki.
„Hvílir mikil leynd yfir þessu öllu“
Æskuvinur Íslendings myrtur í Noregi
Tveir í bílnum sem lenti utan vegar
Skiptir miklu meira máli en fólk grunar
Vélsleðaslys: Þyrlan kölluð út á mesta forgangi
„Skýr skilaboð til Seðlabankans“
Veiting hvalveiðileyfis ekki brot á EES-samningi