Snjóflóðið sem féll á gönguleiðina á Móskarðshnúkum á fyrsta tímanum í dag með þeim afleiðingum að maður grófst undir var lítið flóð en féll í svokallaða landslagsgildru.
Þetta segir Óliver Hilmarsson, sérfræðingur á snjóflóðavakt Veðurstofu Íslands, í samtali við mbl.is. Sérfræðingar frá Veðurstofunni voru í gryfjutöku í Skálafelli þegar snjóflóðið féll og fóru svo á vettvang flóðsins þar sem slysið varð.
„Þetta er flekaflóð, alls ekki stórt. Þetta er bara lítið flóð sem fellur í mjög óheppilegum aðstæðum, það hrúgast í raun allur snjórinn ofan í þröngt gil. Þetta er það sem kallast landslagsgildra í þessum fræðum,“ útskýrir Óliver.
Gul snjóflóðaspá er á suðvesturhorni landsins, sem þýðir að nokkur hætta er á snjóflóðum. Að sögn Ólivers er til skoðunar að færa spána í appelsínugult.
„Það virðist vera að snjóalög séu svolítið óstöðug í vesturvísandi hlíðum, jafnvel mjög óstöðug. Það er mjög mikil umferð búin að vera af fólki á fjallaslóðum í góðu veðri og þetta eru fá flóð. Ástandið virðist vera óstöðugt en afmarkað.“
Aðspurður hvað fólk beri að varast ef það hyggst halda á fjöll segir Óliver sérstaklega mikilvægt að fylgjast með aðstæðum, forðast vesturvísandi hlíðar og landslagsgildrur.
„Það eru klárlega óstöðug snjóalög í þessum brekkum. Við búumst svo sem ekki við stórum flóðum en það eru litlu flóðin sem greinilega geta verið hættuleg.