Háskólabíó tæki Bíó Paradís opnum örmum

Stjórnendur Senu vilja bjóða Bíó Paradís aðstöðu í Háskólabíói og eru tilbúnir að skoða hvaða rekstrarform sem er svo hægt sé að tryggja áframhaldandi starfsemi þessa mikilvæga menningarkvikmyndahúss.

Þetta segir Jón Diðrik Jónsson, forstjóri Senu, í samtali við mbl.is. Fjallað var um í gær að vegna húsnæðisvandræða Bíós Paradísar lyki starfsemi þess að óbreyttu 1. maí og að starfsfólki í afgreiðslu þess hefði þegar verið sagt upp.

Frétt af mbl.is

Lögðu fram hugmynd um tvöföldun leiguverðs

Kvikmyndahúsið Regnboginn, sem rekið var af Senu, var áður í húsnæðinu á Hverfisgötu 54. „Við rákum þarna Regnbogann til margra ára og það var taprekstur á honum. Mér finnst hins vegar búið að vera virkilega gott starf hjá Bíó Paradís og öflugt og mikilvægt starf sem þar er.“

Frétt af mbl.is

Borgin ítrekar mikilvægi Bíós Paradísar

„Hluta af þessu höfum við verið að gera í Háskólabíói, við erum að sýna listrænar myndir og höfum lagt áherslu á íslenskar kvikmyndir,“ segir Jón Diðrik.

„Við höfum viljað bjóða Bíó Paradís velkomið í Háskólabíó og tryggja að það sé öflugt menningarbíó til og við erum til í að skoða hvers konar rekstrarform í því svo hægt sé að tryggja áfram menningarlega kvikmyndahúsastarfsemi, fræðslu og fleira. Í Háskólabíói er góð aðstaða og hægt að efla hana, bæði veitingaaðstöðu og annað, og þá væri hægt að tryggja að það væri allavega til eitt kvikmyndahús sem sinnti þessu á mjög öflugan hátt.“

• Blogga um frétt