Jarðskjálfti af stærð 3,3 varð um 5 kílómetra norðaustur af Grindavík klukkan 19.04 í kvöld. Engir eftirskjálftar hafa fylgt, samkvæmt tilkynningu frá Veðurstofu Íslands.
Um klukkan níu í morgun varð jarðskjálfti sömu stærðar um 2 kílómetra norðaustur af Grindavík og á föstudag varð skjálfti að stærð 4,3 á sama svæði og fannst ansi vel í Grindavík og víðar.
Nýjasta GPS-úrvinnslan sýnir áframhaldandi landris á svæðinu vestan við Þorbjörn. Í heildina hefur land risið um 4,5 sentiímetra frá 20. janúar.
Gervitunglamyndir sýna sömu þróun. Líklegast er að jarðskjálftavirknin stafi af spennubreytingum vegna þessa landriss á svæðinu. Samfara landrisi og breytingum í jarðskorpu má búast við áframhaldandi jarðskjálftavirkni.