Canexel-klæðningin víða illa farin

Á annan tug einstaklinga hefur haft samband við lögmanninn Einar Huga Bjarnason til að kanna stöðu sína vegna hugsanlegs galla í Canexel-klæðningunni sem sett hefur verið utan á þúsundir húsa hér á landi með 25 ára ábyrgð.

Í frétt mbl.is frá því í gær kom fram að umrædd klæðning hefði verið seld um áratugaskeið hér á landi af fyrirtækinu Þ. Þorgrímson. Á síðustu árum hafa tveir endanlegir dómar fallið í Hæstarétti og Landsrétti þar sem klæðningin hefur verið dæmd gölluð og kaupendum verið dæmdar bætur en klæðningin var seld með 25 ára ábyrgð til langs tíma. 

Einar Hugi gerir ekki ráð fyrir að grundvöllur sé fyrir hópmálsókn, til þess sé of mikill munur á einstökum málum. „Fólk er að kaupa þessa klæðningu á mismunandi tímum og samskiptin við söluaðilann hafa verið ólík. Þannig að ég held að það sé heillavænlegast að hver og einn muni sækja sitt mál sjálfur. Hinsvegar er ákveðinn styrkur fólginn í því að það sé þetta margt fólk sem er að upplifa sig í sömu stöðu,“ segir Einar Hugi í samtali við mbl.is.

Meðal þeirra gagna sem hann fékk send í kjölfar þess að mbl.is fjallaði um málið eru meðfylgjandi myndir af klæðningum sem settar voru á hús í Keflavík og Hafnarfirði. Í Hafnarfirði segir eigandinn að gallinn hafi komið í ljós strax við fyrstu rigningu sem hafi skilið eftir sig bylgjur í klæðningunni.

Gallinn virðist ekki vera bundinn við ákveðin svæði þar sem von sé á meiri vætu og veðrun en annars staðar. „Ég taldi að þetta væri meira á votviðrasömum svæðum á landsbyggðinni en það virðist ekki vera raunin. Þetta er líka hér á höfuðborgarsvæðum í efri byggðum og úti um allt land sýnist mér.“