Veðurspár gera ráð fyrir stormi síðdegis, einkum suðvestan- og vestanlands. Frá klukkan tvö til fimm í dag verða hviður allt að 35 m/s undir Hafnarfjalli og norðan til á Snæfellsnesi.
Þetta kemur fram í ábendingu veðurfræðings Vegagerðarinnar.
Gular veðurviðvaranir hafa verið gefnar út á Suðurlandi, við Faxaflóa, Breiðafjörð og á miðhálendinu.
Fram kemur á vef Vegagerðarinnar að aðalleiðir eru mikið til auðar en sums staðar er hálka á fáfarnari vegum. Talsvert er um skemmdir vegna hlýinda og víða slæmar holur í bundnu slitlagi.