„Það er ekkert að frétta úti, það eru fáar eða engar ábendingar að berast. Þetta er bara í pattstöðu. Það hefur ekki neitt breyst, því miður,“ segir Davíð Karl Wiium, bróðir Jóns Þrastar Jónssonar. Í dag, 9. febrúar, er eitt ár liðið frá því Jón Þröstur hvarf sporlaust í Dublin á Írlandi. Davíð segir að árið hafi verið einstaklega erfitt, ekki síst vegna óvissunnar um örlög bróður hans, en fjölskyldan hyggist ekki gefast upp. 

Jón Þröst­ur fór til Dublin til að taka þátt í pókermóti í byrj­un fe­brú­ar. Unn­usta hans, Jana Guðjóns­dótt­ir, var með í för og höfðu þau hugsað sér að skoða borg­ina sam­an að mót­inu loknu. Rann­sókn máls­ins hef­ur lítið sem ekk­ert miðað áfram frá því björg­un­ar­sveit kembdi leit­ar­svæði í borg­inni í byrj­un mars og ábend­ing barst um að Jón Þröst­ur hefði mögu­lega ferðast með leigu­bíl. 

Frétt af mbl.is

Ábending um farartæki skoðuð

„Tíminn bara líður“

Tvær vikur eru síðan nokkrir úr fjölskyldunni voru í Dublin og töluðu við írsku lögregluna. „Þar er það nákvæmlega sama uppi á teningnum og var, þannig að tíminn bara líður. Málið er opið en það er ekkert nýtt að frétta,“ segir Davíð. 

Frá útskrift Davíðs Karls Wiium, bróður Jóns Þrastar. Með þeim á myndinni eru systur Jóns Þrastar, Þórunn og Anna Hildur, og bróðir hans Daníel. Ljósmynd/Facebook

Fjölskyldan hefur ekkert verið í sambandi við lögregluna hér heima síðan í vor, en þá funduðu full­trú­ar rann­sókn­ar­deild­ar lög­regl­unn­ar með írsk­um lög­reglu­yf­ir­völd­um í Dublin. „Tíminn bara líður og það er spurning með næstu skref, það veit eiginlega enginn hver þau verða,“ segir Davíð. 

Frétt af mbl.is

Funduðu um hvarf Jóns Þrastar

Í byrjun desember réðu syst­ir og unn­usta Jóns Þrast­ar írsk­an einka­spæj­ara til að rann­saka hvarfið. Davíð segir að hann sé enn að störfum og einhver vinna hafi átt sér stað. Hún hafi þó engu skilað. „Að minnsta kosti engum mælanlegum árangri, en svo mikið veit ég að ég efast ekkert um að hann sé að vinna vinnuna sína, en það er voðalega lítið nýtt.“

Frétt af mbl.is

Einkaspæjari rannsakar hvarf Jóns Þrastar

Fjölskyldan hefur verið með annan fótinn í Dublin frá hvarfinu og í júní flutti Daní­el Örn Wii­um, bróðir Jóns Þrastar, tímabundið til Dublin. Hann er nú fluttur aftur heim og hefur viðvera fjölskyldunnar í borginni minnkað til muna. „Núna eru þetta bara óregluleg samskipti við lögregluna, enda hefur það ekki mikið upp á sig eins og þetta hefur þróast að hanga úti, ekki nema eitthvað breytist auðvitað.“   

Jón Þröstur á gangi skömmu eftir að hann gekk út af hóteli sínu. Úr öryggismyndavél

Mikilvægt að festast ekki í þráhyggju

Davíð segir það einstaklingsbundið hvernig fjölskyldan hefur tekist á við hvarf Jóns Þrastar. „Almennt held ég að þetta sé allt í rétta átt. Miðað við aðstæður og óvissuna held ég að fólk sé í bata, en það er misjafnt hvernig fólk tekst á við þetta.“

Frétt af mbl.is

„Þurfum einhvers konar málalok“

„Við þurfum öll að fá málalok en á sama tíma verðum við að sætta okkur við að það er eitthvað sem getur tekið tíma. Það er mikilvægt að festast ekki í þráhyggju eða sorg en þetta hangir yfir okkur sem er ekki gott.“

Upptaka frá öryggismyndavél hótelsins sýnir Jón Þröst yfirgefa hótelið um klukkan 11 laugardaginn 9. febrúar. Skjáskot/RTÉ

Hugsa hlýlega til Jóns Þrastar eins og alla daga

Anna Hildur Jónsdóttir, systir Jóns Þrastar, sagði í samtali við The Irish Sun í lok síðasta árs að hún væri ansi hrædd um að bróðir hennar væri látinn og hana gruni að eitthvað saknæmt hafi átt sér stað.

Davíð vill ekki fullyrða neitt og segist hvorki hafa kenningar eða tilfinningu fyrir því sem gerðist. „Á meðan maður veit ekki neitt held ég að það sé ekki hollt, alla vega fyrir mig persónulega, að teikna upp kenningar eða aðstæður sem ég veit ekki einu sinni hvort voru til staðar. Fyrir mitt leyti snýst þetta um að bíða og sjá. Það sem gerðist gerðist og því verður ekki breytt. En hvað það var hef ég ekki hugmynd um.“

Davíð segir að dagsetningin, 9. febrúar, þýði ekkert sérstakt fyrir fjölskylduna þótt vissulega sé það táknrænt að eitt ár sé liðið frá hvarfinu. „Þegar það er svona langt um liðið skiptir ekki hvort það er eitt ár, tíu mánuðir eða eitt og hálft ár liðið, það sem við gerum er það sama og við höfum verið að gera, að halda sambandi og vera góð við hvert annað. Og hugsa hlýlega til Jóns.“

Jóns Þrastar hefur verið saknað í eitt ár og leit hefur engan árangur borið. Ljósmynd/Facebook

Hvarf Jóns Þrastar

• 9. febrúar 2019: Jón Þröstur sést síðast í Whitehall-hverfinu í Dublin. 
• 12. febrúar: Fjölskylda Jóns flýgur til Dublin. 
• 22. febrúar: Bræður Jóns fjalla um leitina í The Late Late Show, vinsælum spjallþætti.  
• 23. febrúar: Björgunarsveitir og sjálfboðaliðar taka þátt í umfangsmikilli leit. 
• 25. febrúar: Bræður Jóns voru gestir sjónvarpsþáttarins Crimecall á írsku sjónvarpsstöðinni RTÉ. 
• 25. febrúar: Lögreglan birti upptökur úr öryggismyndavélum sem sýna síðustu ferðir Jóns. 
• 3. mars: Lögregla rannsakar vísbendingu um hvort Jón hafi mögulega ferðast með leigubíl. 
• 13. mars: Alþjóðalögreglan, Interpol, lýsir eftir Jóni. 
• Apríl: Írska lögreglan ítrekaði beiðni sína um aðstoð frá almenningi við leitina. 
• 4. maí: FJölskyldan opnar heimasíðu um Jón Þröst vegna leitarinnar. 
• 30. maí: Rannsóknarlögreglan á Íslandi fundaði með írskum lögregluyfirvöldum í Dublin. 
• Júní: Daníel Örn Wiium, bróðir Jóns, flytur til Dublin vegna málsins. 
• Desember: Fjölskyldan ræður írskan einkaspæjara. 
• 9. febrúar 2020: Eitt ár liðið síðan síðast sást til Jóns Þrastar í Dublin. 

Tengdar fréttir

Jóns Þrastar leitað

Engar frekari upplýsingar um hvarf Jóns borist

• Leitin í garðinum hefur engan árangur borið
• Þriðji dagur leitarinnar að Jóni Þresti
• Lögreglan búin að girða af svæði
• Hundar og kafarar tekið þátt í leitinni

» Fleiri tengdar fréttir

• Blogga um frétt