Nokkur snjóflóð féllu í Önundarfirði í dag en engin þeirra lokuðu vegum eða ógnuðu byggð. Óvissuástand er enn í gildi vegna snjóflóðahættu á N-Vestfjörðum, að því er fram kemur á vef Veðurstofunnar.
Talsverð úrkoma var á Vestfjörðum og Norðurlandi í dag, rigning á láglendi og snjókoma með skafrenningi til fjalla.
Spár gera ráð fyrir áframhaldandi úrkomu og skafrenningi til fjalla í nótt sem dregur úr í fyrramálið. Ekki er talin hætta í byggð sem stendur en snjóflóðavakt Veðurstofunnar fylgist grannt með aðstæðum í samráði við almannavarnir.
Gular veðurviðvaranir eru í gildi á Vestfjörðum, Breiðafirði og Ströndum. Á þeim svæðum er hvassvirði eða stormur með vindhraða á bilinu 15 til 23 m/s.