Á annað hundrað björgunarsveitarmanna auk þyrlu Landhelgisgæslunnar leita ferðamanns sem varð viðskila við hóp sinn á Sólheimasandi milli klukkan fimm og sex í dag. Óskað var eftir aðstoð björgunarsveitarfólks við leit að manninum um klukkan 19 í kvöld.
„Við erum á fullu að leita. Það er gott veður og í raun bestu aðstæður til leitar,“ segir Jón Hermannsson hjá svæðisstjórn á Suðurlandi. Þyrlan var á leiðinni þegar rætt var við Jón klukkan tæplega níu í kvöld. Auk þess var óskað eftir fleiri leitarhundum á svæðið og áætlað er að þeir verði á bilinu 6-8.
Björgunarsveitir úr Rangárvallar- og Vestur-Skaftafellssýslu kemba svæðið.
Stefnt er að því að halda leit áfram eins lengi og veðrið leyfir en eins og fyrr segir er prýðilegt veður til leitar.