Versnandi veður er í öllum landshlutum. Þetta kemur fram á vef Vegagerðarinnar. Appelsínugul viðvörun er í gildi vegna veðurs á Suðurlandi og Suðausturlandi. Búist er við talsverðri úrkomu á austanverðu landi. Gul viðvörun er í gildi annars staðar á landinu fyrir utan höfuðborgarsvæðið og Vesturland.
Yfirlit: Versnandi veður er nú í öllum landshlutum. #færðin
— Vegagerðin | Iceland Roads (@Vegagerdin) February 19, 2020
Veðrið hefur þegar spillt færð á Suðurlandi og eru vegalokanir í gildi frá Seljalandsfossi og austur að Vík í Mýrdal. Hviður geta farið upp í allt að 25 metra á sekúndu undir Eyjafjöllum.
Spáð er norðaustan 13-20 m/s í kvöld, en 23-28 í fyrstu undir Eyjafjöllum og á Suðausturlandi. Slydda eða snjókoma en rigning við austurströndina. Hiti kringum frostmark.
Norðaustan 13-23 m/s í fyrramálið, hvassast NV til. Snjókoma eða él N-lands, en bjart með köflum syðra. Minnkandi norðanátt síðdegis og kólnar í veðri. Þetta kemur fram á vef Veðurstofunnar.