Ekki höfðu borist margar kvartanir í gær vegna skorts á sorphirðu í Reykjavík, að sögn Sigríðar Ólafsdóttur, rekstrarstjóra sorphirðu hjá Reykjavíkurborg. Sorp er ekki hirt vegna verkfalls Eflingar.

„Við lögðum áherslu á að taka almennt heimilissorp fyrir verkfall. Það er viðkvæm vara en við létum pappír og plast sitja svolítið á hakanum,“ sagði Sigríður. Auk verkfalla hafði óveður einnig áhrif á sorphirðuna. Sigríður sagði að unnið hefði verið á laugardag og sunnudag og náðst að klára að hirða heimilissorp samkvæmt sorphirðudagatalinu.

Hirða hefði átt almennt heimilissorp austan Elliðaáa í þessari viku. Það er venjulega gert á 14 daga fresti. Nú er komið á þriðju viku síðan þar var hreinsað. Um 50 félagsmenn Eflingar vinna við sorphirðuna auk eins sem lagar sorptunnur o.fl. Sigríður segir að eftir því sem verkfallið dregst lengur þyngist róðurinn hjá sorphirðunni þegar því lýkur.

Tengdar fréttir

Kjaraviðræður

Kjaradeilu vísað til ríkissáttasemjara

• Hægagangur og vaxandi ókyrrð
• Aðalsteinn snýr aftur í Karphúsið
• „Mætti ganga hraðar“
• „Okkur þykir Isavia fullrólegt“

» Fleiri tengdar fréttir