Þrír karlmenn voru sakfelldir í Héraðsdómi Reykjavíkur í morgun í stærsta kókaínsmyglmáli sem komið hefur upp hér á landi. Þeir voru ákærðir fyrir að reyna að smygla 16 kílóum af kókaíni til landsins frá Frankfurt í Þýskalandi í maí á síðasta ári. Visir.is greindi fyrst frá.
Brynjar Steingrímsson fékk þyngstan dóm í málinu, eða sjö ára fangelsi. Halldór Anton Jóhannesson fékk sex og hálfs árs fangelsisdóm og Dagur Kjartansson sex ára dóm.
Margrét Rögnvaldsdóttir sem flutti málið fyrir héraðssaksóknara staðfesti þetta í samtali við mbl.is. Hún segir niðurstöðu dómsins í samræmi við kröfur héraðssaksóknara. Hins vegar eigi eftir að fara yfir dóminn, líkt og alltaf er gert, til að meta hvort tilefni er til áfrýjunar.
Í ákæru kom fram að tveir mannanna flugu til Frankfurt í Þýskalandi 10. maí og tóku lest til Amsterdam í Hollandi, að fyrirmælum þess þriðja og annars ónafngreinds aðila. Í Amsterdam hittu þeir þvo óþekkta aðila og fengu tvær ferðatöskur þar sem fíkniefnin voru falin undir fölskum botni.
Tóku þeir aftur lest til Frankfurt þar sem þeir innrituðu töskurnar með fíkniefnunum í flug til Keflavíkur. Yfirvöld á flugvellinum í Frankfurt fundu fíkniefnin í tösku annars þeirra og yfirvöld á Keflavíkurflugvelli í tösku hins. Voru þeir báðir handteknir við komuna til landsins á Keflavíkurflugvelli.