Fimm eru í sóttkví og einn í einangrun vegna mögulegrar kórónuveirusýkingar á Ísafirði, en frá þessu greindi Heilbrigðisstofnun Vestfjarða í dag.
Stofnunin segir í færslu á Facebook að niðurstöðu sé að vænta úr sýnatöku þess einstaklings sem er í einangrun síðar í dag, en þetta eru fyrstu ráðstafanirnar sem gerðar eru á Vestfjörðum vegna kórónuveirunnar.
„Sóttkví er varúðarráðstöfun fyrir einkennalausa einstaklinga sem hafa verið á ferðalögum á skilgreindum áhættusvæðum. Gripið er til einangrunar sem varúðarráðstöfunar ef einhver einkenni eru fyrir hendi sem mögulega geta verið Covid-19,“ segir í færslu heilbrigðisstofnunarinnar vestra.
Einn starfsmaður Fossvogsskóla er þessa dagana í heimasóttkví eftir dvöl á svæði þar sem fólk hafði greinst með kórónuveiruna.
Þetta sagði skólastjóri Fossvogsskóla í tölvupósti til foreldra nemenda skólans í dag. Skólastjórinn brýndi sömuleiðis fyrir foreldrum að senda börn ekki í skólann fyrr en að aflokinni tveggja vikna sóttkví, hafi fjölskyldan ferðast um þau svæði þar sem smithætta er talin mikil.
Fram kom í máli Þórólfs Guðnasonar sóttvarnalæknis á blaðamannafundi fyrr í dag að um tuttugu manns væru í heimasóttkví hér á landi eftir ferðalög erlendis.
Hjón eru í sóttkví á Egilsstöðum eftir skíðaferð til Cortina á Ítalíu og tólf til viðbótar sem voru í þeirri sömu ferð hafa einnig verið beðnir um að vera í heimasóttkví.