Tæplega fjögur hundruð Íslendingar erlendis hafa bæst við í gagnagrunn utanríkisráðuneytisins vegna kórónuveirunnar síðan í gær og er heildarfjöldi þeirra nú kominn í 769. Þetta segir Sveinn H. Guðmarsson, upplýsingafulltrúi ráðuneytisins, við mbl.is.
Í morgun var greint frá því að skráningar í gær væru orðnar um 400, en Sveinn segir að þeim hafi fjölgað mikið síðan þá. Samtals er um að ræða 351 skráningu, en fleiri en einn geta verið á bak við hverja skráningu, til dæmis fjölskyldur.
Sveinn segir að aukninguna megi líklegast rekja til mikillar fjölmiðlaumfjöllunar bæði um veiruna sem og gagnagrunninn í gær.
Segir hann að gagnagrunnurinn sé hugsaður þannig að hægt sé að koma upplýsingum til Íslendinga erlendis þegar meiri háttar vendingar verði á þeim stöðum sem fólkið er statt á. Þá sé einnig gott fyrir borgaraþjónustuna að hafa upplýsingar um hvar Íslendingar séu staddir þegar komi að kórónuveirusýkingum.