Á gjörgæslu eftir hnífstungu á Kópaskeri

Sérsveitarmenn voru fluttir með þyrlu á Kópasker í gærkvöldi vegna …
Sérsveitarmenn voru fluttir með þyrlu á Kópasker í gærkvöldi vegna málsins. Mynd úr safni. mbl.is/​Hari

Karlmaður var stunginn með hnífi í heimahúsi á Kópaskeri um kl. 21 í gærkvöldi. Hann er á gjörgæsludeild á Akureyri og líðan hans sögð stöðug. Árásarmaðurinn, karlmaður á fimmtugsaldri, braut sér leið inn í húsið og lét sig síðan hverfa, en hann var handtekinn um kl. 1 í nótt auk tveggja annarra, sem nú eru í fangageymslu á Akureyri.

Þetta kemur fram í tilkynningu frá lögreglunni á Norðurlandi eystra. Þar segir að sá sem fyrir árásinni varð hafi verið á heimilinu ásamt konu þegar árásarmaðurinn braut sér leið inn í húsið og stakk manninn. Ekki var vitað fyrst um sinn hver árásarmaðurinn var, en lögregla segir ljóst að „málsaðilar“ hafi ekki verið allsgáðir.

Fyrstu menn komu á staðinn tæpum tveimur tímum síðar

„Konan tilkynnti og var hún óslösuð sjálf en lýsti alvarlegum áverkum á manninum. Á þessum tíma var slæmt veður á Kópaskeri og vegir ófærir að þorpinu. Þegar var óskað eftir útkalli sérsveitar ríkislögreglustjóra með þyrlu, auk þess sem starfsmenn Vegagerðarinnar voru ræstir út til að opna lögreglunni leið eftir veginum,“ segir í tilkynningu lögreglu.

Lögreglumenn frá Akureyri og Húsavík fóru á staðinn ásamt rannsóknarlögreglumönnum og komu fyrstu menn á vettvang um kl. 22:50. Læknir sinnti þá þeim slasaða, sem var með takmarkaða meðvitund. Þyrla lenti með sérsveitarmenn á Kópaskeri um kl. 23:40 og flutti þyrlan þann slasaða svo til Akureyrar.

Þrjú handtekin

„Meðan á þessu stóð var unnið að því að upplýsa hver árásarmaðurinn væri. Það var svo um kl. 01:00 sem meintur gerandi var handtekinn á Kópaskeri en það er karlmaður á fimmtugsaldri. Tvennt annað var handtekið og var fólkið flutt í fangageymslu á Akureyri, þar sem það bíður yfirheyrslu. Ljóst er að málsaðilar voru ekki allsgáðir. Málavextir í þessu máli eiga enn eftir að skýrast og frekari vettvangsrannsókn að fara fram auk þess sem metið verður hvort farið verður fram á gæsluvarðhald,“ segir lögregla.



mbl.is