Átta hafa í dag greinst með veiruna sem veldur COVID-19-sjúkdómnum hér á landi. Er heildarfjöldi smitaðra því orðinn 34.
Þetta staðfestir Þórólfur Guðnason sóttvarnalæknir við mbl.is.
Þórólfur segir um að ræða niðurstöður úr sýnum sem tekin voru í gær. Sjö eru með veiruna og segir sóttvarnalæknir að um eitt vafasýni sé að ræða en telja megi það með.
Líkt og hingað til tengjast smit ferðum Íslendinga til skíðasvæða á norðurhluta Ítalíu og í Austurríki.
Á fjórða hundrað er í sóttkví hér á landi en þar eru meðal annars þeir sem komu til landsins frá Veróna um síðustu helgi.