Ásmundur í sjálfskipaðri sóttkví

Ásmundur Friðriksson, þingmaður Sjálfstæðisflokksins, er í sóttkví. Hann er ekki …
Ásmundur Friðriksson, þingmaður Sjálfstæðisflokksins, er í sóttkví. Hann er ekki með kórónuveiruna en vill gæta fyllstu varúðar. Ljósmynd/Aðsend

Ásmundur Friðriksson, þingmaður Sjálfstæðisflokksins, er í sjálfskipaðri sóttkví. Hann er því ekki viðstaddur þingfundinn sem hófst klukkan 13:30 en þar var einmitt greint frá því að einn þingmaður væri í sóttkví. 

Ásmundur og eiginkona hans tóku þá ákvörðun að fara í sóttkví á föstudag eftir að þeim bárust fregnir um að einstaklingur sem var gestkomandi á heimili þeirra á miðvikudag hefði greinst með veiruna. Sýni hafa verið tekin af hjónunum og eru þau hvorugt með veiruna, en ákváðu af öryggisástæðum að halda kyrru fyrir í um tvær vikur, þrátt fyrir að þeim hafi ekki borist símtal frá rakningateymi sóttvarnalæknis. 

„Ég var búinn að vera veikur sjálfur og fór heim af þinginu á þriðjudaginn og ekki verið í sambandi við neinn úr þingflokknum eða aðra. Ég var ansi slappur en ég er allur að koma til,“ segir Ásmundur í samtali við mbl.is.

Hann hefur því tekið þátt í nefndafundum og öðru fundahaldi í gegnum fjarskiptabúnað síðustu daga. „Það hefur gengið ótrúlega vel og segir að við getum notað þetta mikið meira í þinginu.“ 

Setið er í öðru hverju sæti í þingsalnum vegna kórónuveirunnar.
Setið er í öðru hverju sæti í þingsalnum vegna kórónuveirunnar. mbl.is/Kristinn Magnússon

Engin þjóð að standa sig betur en Ísland

Ásmundur fylgist með þingfundi dagsins og er ánægður með þær ráðstafanir sem hafa verið gerðar á störfum þingsins vegna útbreiðslu kórónuveirunnar og samkomubannsins sem tók gildi í gær. „Ég held að þetta sé bara mjög gott, að við séum öll að fara eftir ráðleggingum.“ 

Þá er Ásmundur gríðarlega sáttur við störf almannavarna. „Ég held að það sé engin þjóð í heiminum að gera þetta betur en við. Stærstu stjörnurnar í samfélaginu eru fólkið sem hefur verið að þrengja að okkur og gera lífið erfiðara en við treystum þeim svo vel að við lítum öll upp til þeirra.“

mbl.is