Samninganefndir stéttarfélaga starfsmanna í álveri Ísal í Straumsvík og viðsemjendur þeirra hafa undirritað nýjan kjarasamning. Verkfallsaðgerðum sem hefjast áttu 24. mars hefur verið frestað um tvær vikur.
Nýju álverssamningarnir eru afturvirkir og gilda frá 1. júní á síðasta ári og til 31. mars á næsta ári, eða í alls 22 mánuði.
Samkvæmt upplýsingum Kolbeins Gunnarssonar, formanns verkalýðsfélagsins Hlífar, byggir samningur félagsins í öllum meginatriðum á þeim kjarasamningum sem gerðir hafa verið á umliðnu ári. Því til viðbótar hafi náðst inn að hluta leiðréttingar á ýmsu, þar sem laun starfsfólks í álverinu hafi dregist aftur úr öðrum samningum frá 2015.
Kolbeinn segir menn hafa beðið í tvo mánuði eftir að ljúka þessari vinnu því félagið hafi verið sátt við þau drög sem lágu fyrir í janúar en fyrirtækið hafi ekki fengið heimild frá Rio Tinto til að skrifa undir. Á þriðjudag kom svo staðfesting frá Rio Tinto og skrifað var undir á miðvikudag. Þrýstingur vegna verkfallsaðgerða virðist því hafa skilað árangri. Gert er ráð fyrir að kosningu um samningana verði lokið 27. mars. omfr@mbl.is