Þjófar á ferðinni í borginni

Þjófar voru stöðvaðir í þrígang í matvöruverslun við Fiskislóð síðdegis í gær og í gærkvöldi. Eins var stolið af kaffistofu starfsmanna í fyrirtæki í Árbænum og á bar við Laugaveg.

Þrjár tilkynningar bárust til lögreglunnar á höfuðborgarsvæðinu, klukkan 17:11, 18:59 og 21:56, um einstaklinga sem voru stöðvaðir er þeir voru að yfirgefa matvöruverslunina við Fiskislóð með varning sem þeir höfðu ekki greitt fyrir. 

Síðdegis var síðan tilkynnt um þjófnað á veski úr yfirhöfn starfsmanns í fyrirtæki í Árbænum.  Yfirhöfnin hafði verið í kaffistofu starfsmanna. Í veskinu voru greiðslukort, ökuskírteini og reiðufé.

Á ellefta tímanum var síðan tilkynnt  um þjófnað á farsíma frá veitingastað / bar við Laugaveg.  Kona sem grunuð er um þjófnaðinn er einnig grunuð um fjársvik þar sem hún yfirgaf staðinn án þess að greiða fyrir veitingar sem hún hafði fengið.

mbl.is
Fleira áhugavert
Fleira áhugavert