Boðað til skyndifundar í stjórn SÁÁ
Setja bókamerki
Stjórn SÁÁ var nú í hádeginu boðuð til skyndifundar. Mun hann fara fram kl. 17:00 á morgun. Ástæða fundarins er uppsögn yfirlæknis samtakanna og afsögn þriggja af níu úr framkvæmdastjórn SÁÁ.
Líkt og Morgunblaðið hefur greint frá ákvað Valgerður Á. Rúnarsdóttir, yfirlæknir á Vogi, að segja starfi sínu lausu vegna ágreinings við Arnþór Jónsson, formann samtakanna. Vill hún meina að formaðurinn hafi stigið inn á verksvið hennar þegar hann tók ákvörðun um að segja upp sálfræðingum og lýðheilsufræðingi sem störfuðu á vettvangi SÁÁ. Ákvörðunin var tekin vegna aðsteðjandi rekstrarvanda SÁÁ og tekjutaps þar sem ekki verður hægt að ráðast í hina árlegu Álfasölu.
Í gær sögðu þrír af níu í framkvæmdastjórn SÁÁ af sér í mótmælaskyni við framgöngu formannsins. Þá hefur mikil ólga komið upp í baklandi samtakanna, m.a. í 48 manna stjórn þeirra. Hafa margir félagsmenn tjáð sig opinberlega og lýst miklum áhyggjum yfir því að Valgerður hafi ákveðið að segja starfi sínu lausu.
Í samtali við mbl.is í gær sagði Arnþór Jónsson að enginn ágreiningur væri uppi milli sín og Valgerðar. Það væru einfaldlega „kjaftasögur.“ Stangast sú fullyrðing á við upplýsingar sem Morgunblaðið hefur eftir stjórnarmönnum í samtökunum sem lýst hafa langvarandi átökum þeirra í millum. Síðastliðið haust lét Valgerður formlega í ljós áhyggjur sínar vegna framkomu formanns SÁÁ í hennar garð.
Fjárfestingin 115 milljarðar króna
„Menn eru bara búnir að forgangsraða“
„Það er skiljanlegt að þolinmæði þeirra sé lítil“
Hafa samþykkt kaup fyrir um 9,2 milljarða
29 nautgripir fundust dauðir
Ekki byggt í takt við áform sveitarfélaga