„Vinnan heldur áfram en það hægir á henni og afgreiðslur frestast. Sveitarfélögin þurfa líka á öllu sínu fólki að halda núna og hafa lítið svigrúm í önnur verkefni,“ segir Róbert Ragnarsson, framkvæmdastjóri RR ráðgjafar.
Útbreiðsla kórónuveirufaraldursins hefur sett strik í reikninginn við undirbúningsvinnu fyrir sameiningu sveitarfélaga víða um land. Fyrirtæki Róberts heldur utan um slíka vinnu á fjórum stöðum; á Suðurlandi, á Austurlandi, í Þingeyjarsýslu og í Austur-Húnavatnssýslu.
„Við höfum frestað öllum verkþáttum þar sem fólk þarf að hittast á vinnustofum og mun það leiða til þess að verkefnum seinkar. Við höfum verið með fjölmenna fjarfundi þar sem upplýsingum er miðlað og átt í samráði. Þeir fundir hafa gengið vonum framar, en fjarfundaform hentar ekki nægilega vel fyrir vinnustofur,“ segir Róbert í umfjöllun um mál þetta í Morgunblaðinu í dag.
Eins og Morgunblaðið hefur greint frá höfðu fimm sveitarfélög í Vestur-Skaftafellssýslu og Rangárvallasýslu áformað að taka ákvörðun í vor um það hvort hefja ætti formlegar sameiningarviðræður sem gæti skilað nýju fimm þúsund manna sveitarfélagi. Ljóst er að þau áform frestast nú. Greiningarvinna heldur þó áfram og fjarfundir.