Fjöldi staðfestra smita af völdum kórónuveirunnar er nú 1.220 samkvæmt tölum sem birtar voru á covid.is eftir hádegi. Greindum smitum fjölgaði um 85 í gær, en tölurnar sýna fjölda smita eftir gærdaginn.
Smituðum fjölgar því töluvert á milli daga en 49 smit voru staðfest daginn á undan. Enn sem áður er um helmingur þeirra með staðfest smit í sóttkví við greiningu, eða 53 prósent.
74 smitanna voru greind á sýkla- og veirufræðideild Landspítalans og 11 hjá Íslenskri erfðagreiningu.
Samtals hafa verið tekin 19.516 sýni. 35 eru á sjúkrahúsi, þar af 11 á gjörgæslu.
993 eru í einangrun, 7.822 eru í sóttkví og 7.735 hafa lokið sóttkví. 225 hafa náð fullum bata.