Fjöldi staðfestra smita af völdum kórónuveirunnar er nú 1.319 samkvæmt tölum sem birtar voru á covid.is eftir hádegi. Greindum smitum fjölgaði um 99 í gær, en tölurnar sýna fjölda smita eftir gærdaginn.
Þetta er töluverð fjölgun frá því dagana á undan en 85 smit voru staðfest daginn á undan og 49 daginn þar áður.
Samtals hafa verið tekin 20.930 sýni. 41 er á sjúkrahúsi, þar af 12 á gjörgæslu og hefur því fjölgað um einn síðan í gær.
1.047 eru í einangrun, 7.166 eru í sóttkví og 8.945 hafa lokið sóttkví. 270 hafa náð fullum bata.
Smit hafa greinst í öllum landshlutum og eru þau fæst á Austurlandi eða sex talsins. Smitum hefur fjölgað mikið á Vestfjörðum og eru orðin 17 talsins.
Sem fyrr eru langflest smit á höfuðborgarsvæðinu, eða 982, og 3.654 eru þar í sóttkví, sem eru töluvert færri en í gær.