Mesta álag á gjörgæsludeildir gæti orðið í næstu viku, dymbilviku, en þá er búist við því að 10 manns liggi þar inni á sama tíma, en samkvæmt svartsýnni spá gætu það verið 18 manns.
Þetta er meðal þess sem fram kemur í uppfærðu spálíkani sem unnið hefur verið af vísindamönnum frá Háskóla Íslands, embætti landlæknis og Landspítala.
Spáin um heildarfjölda smita hefur örlítið breyst en nú er búist er við því að á meðan kórónuveirufaraldurinn gengur yfir landið muni rúmlega 1.800 manns á Íslandi verða greindir með COVID-19, en talan gæti náð nær 2.500 manns samkvæmt svartsýnustu spá. Fyrri talan hefur hækkað um 100 en seinni lækkað um 300.
Gert er ráð fyrir að fjöldi greindra einstaklinga með virkan sjúkdóm nái hámarki í þessari viku og en gæti viku seinna náð 1700 manns samkvæmt svartsýnni spá.
Frá því að spálíkanið var fyrst birt hefur auknu álagi verið spáð á heilbrigðiskerfið og samkvæmt uppfærðri spá er gert er ráð fyrir að á meðan að faraldurinn gengur yfir muni 120 manns þarfnast innlagnar á sjúkrahúsi, en gæti náð hátt í 180 manns.
Mesta álag á heilbrigðisþjónustu vegna sjúkrahúsinnlagna verður fyrir miðjan apríl en þá er gert ráð fyrir að um það bil 60 einstaklingar geti verið inniliggjandi á sama tíma, en svartsýnni spá er 90 einstaklingar.
Gert er ráð fyrir því að á tíma faraldursins muni um 26 einstaklingar veikjast alvarlega, þ.e. þurfa innlögn á gjörgæslu, á tímabilinu en svartsýnni spá er 40 einstaklingar.
Mesta álag á gjörgæsludeildir gæti orðið í annarri viku apríl, en þá er búist við því að 10 manns liggi þar inni á sama tíma, en samkvæmt svartsýnni spá gætu það verið 18 manns, líkt og fram kom hér að ofan.
Þá segir í uppfærðri spá að smávægileg hliðrun aldursdreifingar í átt að fleiri greindum smitum meðal einstaklinga yfir sextugt myndi auka álag á heilbrigðisþjónustu talsvert.