Borgaraþjónusta utanríkisráðuneytisins hefur afgreitt ríflega 4.500 fyrirspurnir frá miðjum marsmánuði. Áherslan er áfram á að aðstoða þá sem enn eru erlendis en vilja komast heim.
Í þeim tilgangi hefur verið haft beint samband við um 3.500 manns sem eru skráðir í grunninn. Af þeim eru 3.100 komnir heim eða hyggjast dveljast áfram erlendis en á þriðja hundrað eru á heimleið eða hafa ekki fundið greiða leið heim.
Þetta kemur fram í stöðuskýrslu neyðarstigs vegna COVID-19.
Þar kemur meðal annars fram að Icelandair mun fljúga til og frá Alicante hinn 8. apríl og er flugið komið í sölu á vef Icelandair. Um er að ræða síðasta beina flugið milli Spánar og Íslands á áætlun næstu vikurnar. Fluginu er ætlað að koma til móts við þá Íslendinga á Spáni sem vilja komast heim til Íslands, nú þegar flestar ferðir falla niður næstu vikur, og er í samræmi við samning íslenskra stjórnvalda við Icelandair.
Almannavarnir og utanríkisþjónustan fylgjast náið með heimflutningum Norðurlandabúa og annarra Evrópubúa og vinna saman að því að aðstoða Íslendinga við að komast að í þær ferðir. Þetta er eina leiðin heim frá þeim ríkjum sem hafa algjörlega lokað landamærum sínum og munu fleiri fá að nýta sér slíkt flug á næstu dögum.