Flest stærstu stéttarfélög landsins hafa ákveðið að hafa sumarhús og sumarhúsabyggðir sínar lokuð um páskana og sum jafnvel fram í maí, vegna tilmæla heilbrigðisyfirvalda.
Hjá sumum félögum hefur ekki þurft að loka því félagsmenn hafa sjálfir afbókað vegna tilmæla heilbrigðisyfirvalda. Félagsmenn sem hafa borgað fá leigugjaldið endurgreitt.
Almannavarnir hafa áhyggjur af því að ferðalög fólks um páskana geti valdið auknu álagi á heilbrigðiskerfið, ekki síst ef fólk hópast í sumarhús á svæðum þar sem heilsugæsla er veik. Einnig að fólk gleymi sér í smitgát þegar það kemur í nýtt umhverfi og dvelur þar með öðru fólki.
Í umfjöllun um mál þetta í Morgunblaðinu í dag kemur fram að Almannavarnir hafa áhyggjur af auknu álagi á heilbrigðiskerfið vegna hugsanlegra slysa í kjölfar mikillar umferðar um páskahelgina.