Gæsluvarðhald yfir karlmanni á sextugsaldri vegna andláts eiginkonu hans á heimili þeirra hefur verið framlengt til 15. apríl, eftir úrskurð Héraðsdóms Reykjaness. Þetta staðfestir Ólafur Helgi Kjartansson, lögreglustjóri á Suðurnesjum.
Karlmaðurinn hefur setið í gæsluvarðhaldi frá 2. apríl, eða síðan krufning á líki eiginkonu hans leiddi í ljós að líklegt væri að andlátið hefði borið að með saknæmum hætti. Konan hafði látist 28. mars á heimili þeirra í Sandgerði.
Þetta er annað tveggja andláta sem lögreglan hefur til rannsóknar þar sem grunur er um heimilisofbeldi. Karlmaður á þrítugsaldri var á mánudagskvöld úrskurðaður í gæsluvarðhald til 17. apríl vegna rannsóknar á andláti konu á sextugsaldri í Hafnarfirði aðfaranótt mánudags.