„Við fögnum aðgerðapakkanum, enda með vilyrði fyrir samráð um útfærslu á honum, en það var nauðsynlegt að fá þetta fram fyrir mánaðamót,“ segir Drífa Snædal, forseti ASÍ, um framhald hlutabótaleiðarinnar og stuðning stjórnvalda við launagreiðslur fyrirtækja.
Aðgerðirnar voru kynntar í Safnahúsinu í hádeginu en um er að ræða þriðja aðgerðapakkann vegna kórónuveirufaraldursins.
Katrín Jakobsdóttir forsætisráðherra greindi frá því að hlutabótaleiðin svokallaða verður framlengd með óbreyttum hætti út júní. Jafnframt kom fram að fyrirtæki sem orðið hafa fyrir að lágmarki 75% tekjufalli og sjá fram á áframhaldandi tekjufall geti sótt um stuðning úr ríkissjóði vegna greiðslu launa á uppsagnarfresti. Þá verða settar einfaldari reglur um fjárhagslega endurskipulagningu fyrirtækja sem auðveldar þeim að komast í greiðsluskjól.
Drífa bendir á að það eigi eftir að útfæra skilyrði og frumvörpin sjálf en ASÍ mun meðal annarra vinna með stjórnvöldum að útfærsluatriðum tengdum aðgerðunum.
„Ljóst var að það þyrfti að framlengja hlutabótaleiðina og það er gott að hún sé tröppuð niður, enda er um að ræða tímabundin úrræði og vonandi tímabundna erfiðleika,“ segir Drífa.
Drífa segir ljóst að frekari uppsagnir séu væntanlegar og því mikilvægt, eins og kom fram í máli forsætisráðherra, að tryggja réttindi launafólks. Fólk verði að hafa möguleika á því að komast í önnur og ný störf en ASÍ lagði áherslu á að fólk væri ekki í vistabandi við fyrirtæki sem myndi hugsanlega ekki endurráða það að erfiðleikum loknum.
„Þetta er eitt þeirra skrefa sem þarf að taka,“ segir Drífa um tíðindi dagsins. Hún ítrekar að það skipti miklu máli hvenrig aðgerðirnar verða útfærðar.