Tíu skammtar af lyfinu remdesivír eru komnir til landsins og dugir hver þeirra fyrir tíu daga meðferð á sjúklingi sem er illa haldinn af Covid-19. Rannsóknir á lyfinu hafa hingað til gefið tilefni til bjartsýni um virkni þess.
Már Kristjánsson yfirlæknir smitsjúkdómalækninga á Landspítalanum staðfestir þetta í samtali við mbl.is. Hann bendir þó á að notkun þess verður takmörkuð enda rannsóknir ekki á langt veg komnar, og að það verði aðeins notað á sjúklinga sem komnir eru í öndunarvél. Lyfinu er þá sprautað í æð.
Lyfið hefur enn ekki verið notað á Íslandi en erlendis hefur það sums staðar stytt sjúkdómstímann um 30%, sem samsvarar styttingu úr 15 dögum í 11.
„Enn hefur enginn verið settur á þetta lyf en það kom bara til landsins nú 6. maí,“ segir Már. „Við eigum þetta þá hér í handraðanum þegar og ef einhver verður hér mjög veikur af Covid-19 aftur,“ segir hann. Þá geti komið til greina að nota lyfið.
Remdesivir er veirulyf sem þróað var og prófað sem meðferð við ebóla-veiru. Og er það lyf sem hvað flestar tilraunir hafa verið gerðar með í tengslum við kórónuveiruna. Remdesvir er jafnframt fyrsta lyfið sem virðist gagnast að ráði við meðferð sjúklinga sem glíma við COVID-19.