Gabríel Sindri Benediktsson, 16 ára drengur búsettur í Breiðholti, er bestur í heimi í tölvuleiknum Rocket League. Tölvuleikurinn er ekki aðeins gríðarlega vinsæll á Íslandi, heldur spila hann 60 milljónir um allan heim, ef marka má heimasíðuna.
Leikurinn er fótbolti: Markmiðið er að skora og leikmennirnir eru bílar með sjálfstæðan vilja. Þeim vilja leiðbeinir sá sem heldur á fjarstýringunni.
„Ég er voða ánægður með þetta,“ segir Gabríel í samtali við Morgunblaðið í dag. „Þetta verður bara léttara og léttara.“ Þar vísar hann til þess að honum gengur æ betur að halda sér efstum á heimslistanum yfir þá sem keppa einn á móti einum í leiknum. Hann hefur nú trónað þar á toppnum í mánuð, en hann komst líka efst um hríð árin 2018 og 2019. Hann segir samkeppnina harða: „Það eru alltaf nokkrir gaurar að reyna að vera númer eitt.“
Rafíþróttir útheimta að sögn Gabríels ekki minni elju og vinnusemi af iðkendum sínum en hefðbundnara sport. „Maður vaknar oftast klukkan átta og spilar til tvö, tekur sér svo hlé en um sex- eða sjöleytið byrjar maður aftur og heldur áfram fram að háttatíma,“ segir hann. Ekki minna en hver annar vinnudagur, sem sagt, og það er einmitt málið: Gabríel sér fram á að geta unnið við þetta ef honum gengur vel að koma Twitch-aðgangi sínum af stað, þar sem hann streymir frá sínum daglegu störfum fyrir fylgjendur sína, sem fjölgar að vonum jafnt og þétt hjá heimsmeistaranum, sem kallar sig OSM.