Ekkert nýtt Covid-19-smit greindist í gær hér á landi. Áfram eru þrjú virk smit og eru viðkomandi allir í einangrun, en enginn á sjúkrahúsi. Þá eru 757 einstaklingar í sóttkví.
Þetta kemur fram í nýjum tölum á covid.is. Tólf sýni voru tekin í gær, öll á sýkla- og veirufræðideild Landspítalans.
Samtals hafa 1.804 smit greinst hér á landi, en 58.856 sýni hafa verið tekin og 20.370 hafa lokið sóttkví.
Neyðarstigi almannavarna vegna kórónuveirunnar var aflétt hér á landi í dag og frekari aflétting samkomutakmarkana tók sömuleiðis gildi á miðnætti. Meðal helstu breytinga er að nú mega 200 koma saman en ekki 50 eins og áður. Þá er tveggja metra reglan orðin valkvæð.
Upplýsingafundur almannavarna hefst klukkan 14 en fundurinn í dag verður sá síðasti sem haldinn verður með reglubundnu sniði.