Fjölmiðlanefnd hefur lagt 1,2 milljóna króna stjórnvaldssekt á Ríkisútvarpið vegna norsku þáttanna Exit, eða Útrás eins og þeir kallast á íslensku, sem voru aðgengilegir fyrir alla í spilara RÚV, en þættirnir eru stranglega bannaðir börnum. Síminn lagði fram kvörtun vegna málsins í febrúar og fór fram á hámarkssektir. Fjölmiðlanefnd telur brotið alvarlegt og hefur gert RÚV að fjarlægja þættina af vefnum fyrir 5. júní.
Norska sjónvarpsþáttaröðin Exit fjallar um úrkynjaðan og siðspilltan lífsstíl manna úr fjármálaheiminum, eins og það er orðað á vef RÚV, og hefur verið opin öllum í spilara RÚV, bæði á netinu og í sjónvarpinu, þó svo að þáttaröðin sé rauðmerkt og því stranglega bönnuð börnum. Eftir að kvörtunin var lögð fram kom RÚV á aðvörun í spilaranum þar sem kemur fram að efnið sé ekki við hæfi barna. Notandinn verður þá að staðfesta að hann sé eldri en 16 ára áður en hann getur nálgast þættina.
Í kæru Símans til Fjölmiðlanefndar vegna málsins er bent á að engar aðgangsstýringar séu á spilara Ríkisútvarpsins til að verja börn og ungmenni fyrir grófu myndefni. Jafnframt er athygli nefndarinnar vakin á að þarna sé á ferðinni einstaklega gróft efni sem bannað sé börnum 16 ára og yngri.
Vinna við að koma á aðgangsstýring í spilara RÚV á netinu hefur farið fram síðan í febrúar en verkið hefur tafist af ýmsum ástæðum, að því er fram kemur í úrskurðinum. Ástæðurnar eru m.a. Sagðar verkföll í skólakerfinu, orlof, fjarvera frá vinna og aðstæður sem tengjast kórónuveirufaraldrinum. Þá hafa einnig komið upp tæknileg vandamál. Aðgangsstýringin á að vera tilbúin fyrir lok júnímánaðar.