Framkvæmdastjóri Alzheimersamtakanna segir fyrstu viðbrögð við fregnum um að maður hafi verið ákærður fyrir að nauðga tveimur konum um áttrætt með alzheimer á háu stigi vera mikla hryggð og sorg.
„Fyrstu viðbrögð eru mikil hryggð og sorg yfir því að svona skuli einhver gera, að fólki skuli misnota þessar aðstæður sem fólk er í sem er varnarlaust og getur litla björg sér veitt,“ segir Vilborg Gunnarsdóttir, framkvæmdastjóri Alzheimersamtakanna.
Hún segir meint brot ekki hafa komið inn á borð samtakanna. Þau vita ekki hvort þau áttu sér stað á stofnun eða annars staðar og ekki heldur hvort um starfsmann er að ræða. Samtökin hafa ekkert rætt við lögregluna vegna málsins en aðspurð segist Vilborg sem betur fer ekki muna eftir því að sams konar mál hafi áður komið upp.
Í ákærunni er maðurinn sagður hafa nauðgað annarri konunni í sumarbyrjun 2017. Þá er hann sagður hafa notfært sér að konan var með heilabilun af völdum blóðrástruflana og alzheimer á háu stigi. Hún hafi þannig ekki getað spornað við gjörðum mannsins eða skilið þær.
Þá er maðurinn einnig sagður hafa nauðgað hinni konunni þrisvar sinnum haustið 2018. Hann er sagður hafa notfært sér að konan var með alzheimer og þannig ekki getað spornað við verknaðinum eða skilið þýðingu hans.