Fjórir unnu 66 milljónir í öðrum vinningi í Eurojackpot-útdrætti kvöldsins en fyrsti vinningur, upp á tæpa tvo milljarða, gekk ekki út. Þrír af þessum fjórum keyptu sína miða í Þýskalandi og einn í Finnlandi.
Þá skiptu átta með sér þriðja vinningi og fá þeir rétt tæpar 12 milljónir króna hver. Miðarnir voru keyptir í Noregi, Króatíu, Finnlandi og Þýskalandi.
Enginn var með fimm réttar Jókertölur í réttri röð en tveir með fjórar réttar tölur. Fá þeir báðir 100 þúsund krónur í vinning en miðarnir voru keyptir á lotto.is.