Víða um land er milt og gott veður og hefur hiti til að mynda farið í 20 gráður í uppsveitum Árnessýslu. Samkvæmt vef Veðurstofunnar hefur hæsti hiti dagsins mælst í Hvammi undir Eyjafjöllum, 67,3 gráður. Ekki er þó um alheimshitamet að ræða, eins og flestir átta sig fljótlega á.
„Þetta er bilaður mælir, það er ekkert að marka þetta,“ segir hlæjandi veðurfræðingur þegar hann er spurður hvað sé í gangi á Hvammi.
„Mælirinn sýndi 66 gráður í morgun og eitthvað álíka mikið rugl fyrir helgi,“ segir veðurfræðingurinn.
Hann bætir við að um sé að ræða mæli sem Vegagerðin á og þar sé líklega unnið að því að kippa þessu í liðinn.
Annars staðar á landinu er veður víða gott en 18,5 gráður hafa mælst á Þingvöllum og 20 gráður í uppsveitum Árnessýslu.
Næstu daga verður sérstaklega hlýtt norðaustan- og austanlands og veðurfræðingur hvetur fólk til að fylgjast með Egilsstöðum og nágrenni á morgun. Þar gæti veður orðið ansi gott.