Háskólinn í Reykjavík brautskráði 600 nemendur við hátíðlegar athafnir í Hörpu í dag. Vegna takmarkana á hópastærðum vegna COVID-19 var brautskráningunni skipt í tvær athafnir og voru nemendur tæknisviðs útskrifaðir fyrir hádegi og nemendur samfélagssviðs eftir hádegi. 437 nemendur brautskráðust úr grunnnámi, 160 úr meistaranámi og þrír úr doktorsnámi. Í útskriftarhópnum voru 269 konur og 331 karl.

Flestir luku námi frá tölvunarfræðideild háskólans að þessu sinni, eða 144 nemendur, þar af fjórir með meistaragráðu. Frá viðskiptadeild háskólans útskrifuðust 133 nemendur, þar af 51 með meistaragráðu og einn með doktorsgráðu. Frá verkfræðideild útskrifuðust 126, þar af 49 með meistaragráðu og einn með doktorsgráðu. Sálfræðideild útskrifaði 74 nemendur, þar af 21 með meistaragráðu og einn með doktorsgráðu. Það er í fyrsta sinn sem doktorsnemi útskrifast frá sálfræðideild háskólans. Lagadeild útskrifaði 53 nemendur, þar af 19 með meistaragráðu. Frá íþróttafræðideild útskrifuðust 44 þar af 16 úr meistaranámi. Loks útskrifuðust 26 nemendur frá iðn- og tæknifræðideild.

Frá útskrift nemenda á tæknisviði Háskólans í Reykjavík í dag. Ljósmynd/HR

Þórður Atlason, BSc í hugbúnaðarverkfræði og Eygló María Björnsdóttir, BSc í viðskiptafræði og tölvunarfræði fluttu ávörp fyrir hönd útskriftarnemenda.Verðlaun Viðskiptaráðs Íslands fyrir framúrskarandi námsárangur í grunnnámi hlutu að þessu sinni: Hákon Ingi Stefánsson diplóma í rafiðnfræði, Kristjana Ósk Kristinsdóttir BSc í heilbrigðisverkfræði, Gunnar Guðmundsson BSc í íþróttafræði, Íris Þóra Júlíusdóttir BA í lögfræði, Jóhanna Margrét Gunnarsdóttir BSc í sálfræði, Hávar Snær Gunnarsson BSc í hagfræði og fjármálum og Þórður Friðriksson BSc í hugbúnaðarverkfræði. 

Flestir luku námi frá tölvunarfræðideild háskólans að þessu sinni, eða 144 nemendur, þar af fjórir með meistaragráðu. Ljósmynd/HR

Í ávarpi sínu til útskriftarnema talaði Dr. Ari Kristinn Jónsson, rektor Háskólans í Reykjavík, meðal annars um mikilvægi samkeppni sem driffjöður fyrir fjölbreytni og framþróun í íslensku háskólaumhverfi:

„Samkeppnin hefur gert miklu meira en að styrkja HR. Hún hefur skilað ótrúlegum framförum fyrir háskólakerfið í heild sinni. Í dag er háskólastarf á Íslandi öflugra, breiðara og sterkara en ella hefði verið og það er til hagsbóta fyrir okkur öll. Það sem þó skiptir okkur mestu máli er að samkeppni hefur fært nemendum valkosti í sínu námi. Nemendur geta valið milli mismunandi háskóla og þannig valið sér nám, aðstöðu, kennsluhætti og þjónustu sem hentar þeim best. Þessi samkeppni um nemendur heldur okkur líka á tánum. Því er það okkur í HR alltaf efst í huga að tryggja nemendum okkar nám í hæsta gæðaflokki, fyrsta flokks aðstöðu og það sem mestu skiptir, tækifæri til að skapa sér sína eigin framtíð.“

Útskrift HR 2020: 

• Verkfræðideild 152
  Grunnnám 79, meistaranám 71,
  doktorsnám 2. Konur 75, karlar 77.
• Viðskiptadeild 143
  Grunnnám 63, meistaranám 80. Konur 79, karlar 64.
• Tölvunarfræðideild 125
  Grunnnám 116, meistaranám 9. Konur 30, karlar 95.
• Sálfræðideild 76
  Grunnnám 53, meistaranám 23. Konur 61, karlar 15.
• Lagadeild 62
  Grunnnám 31, meistaranám 31. Konur 37, karlar 25.
• Iðn- og tæknifræðideild 36 Konur 5, karlar 31.
• Íþróttafræðideild 33
  Grunnnám 22, meistaranám 11. Konur 14, karlar 19.

Tengdar fréttir

Útskriftir

181 útskrifaðist úr HR í gær

• Stefnir á lögfræði næsta haust
• Dúxaði með 9,1 eftir tvö og hálft ár
• Gunnar Þór dúx í læknadeild í Debrecen
• Landsliðskokkur dúxar í lögfræði

» Fleiri tengdar fréttir

• Blogga um frétt