Allt lék á reiðiskjálfi í 25 sekúndur

Upptaka úr öryggismyndavél í húsi á Reykjum á Reykjaströnd í …
Upptaka úr öryggismyndavél í húsi á Reykjum á Reykjaströnd í Skagafirði sýnir að áhrif seinni stóra skjálftans sem reið yfir á laugardag vörðu í um 25 sekúndur. Skjáskot/Facebook

Óhætt er að segja að allt hafi leikið á reiðiskjálfi í húsi á Reykjum í Reykjaströnd í Skagafirði þegar einn af stóru skjálftunum þremur reið yfir Norðurland um helgina. Húsið er um 60 kílómetra frá upptökum skjálftahrinunnar norður af Siglufirði. 

Á upptöku úr öryggismyndavél sem sjá má hér að neðan má sjá hvernig áhrif skjálftans sem varð klukkan 19:26 á laugardag vörðu í um 25 sekúndur, en skjálftinn mældist 5,6 að stærð. Drunurnar sem fylgja eru vægast sagt óhugnanlegar. 

Veðurstofa Íslands fékk myndskeiðið sent og deildi á Facebook-síðu sinni og lætur áhugaverðan fróðleiksmola fylgja með um staðhætti: „Reykir eru skammt frá Grettislaug þar sem Grettir á að hafa hlýjað sér eftir Drangeyjarsund. Glámur, draugurinn sem Grettir glímdi við, hefði verið stoltur af þessum látum sem heyrast greinilega, en sjón er sögu ríkari.“

 

mbl.is
Fleira áhugavert
Fleira áhugavert