Heyra mátti saumnál detta þrátt fyrir að fjöldi fólks væri saman kominn framan við húsið við Bræðraborgastíg þar sem þrír létust í eldsvoða síðastliðinn fimmtudag.

Í kjölfar samstöðufundar á Austurvelli, þar sem athygli var vakin á bágri aðstöðu erlends verkafólks á Íslandi, leiddi lögregla göngu að húsinu og bauðst fólki að votta þeim látnu og aðstandendum þeirra virðingu sína með því að leggja blóm við húsið.

Samkvæmt ljósmyndara mbl.is sem var á staðnum liggur brunalyktin enn í loftinu og var sorgin og samúðin nánast áþreifanleg í samstöðunni.