Ekki með nægilega sterk gögn til að kæra

Lögreglan á Suðurlandi náði tali af hópi erlendra ökumanna sem var leitað í gær, þriðjudag. Hópurinn, sem kom til landsins með Norrænu, hafði varið nokkrum dögum í að keyra um landið á stórum jeppum. Hópurinn birti myndbönd af akstri sínum á Facebook og grunur liggur á að þeir hafi m.a. ekið utanvegar á ólöglegum svæðum.

Vísir greindi fyrst frá málinu.

Fjölnir Sæmundsson, varðstjóri hjá lögreglunni á Hvolsvelli, sagði í samtali við mbl.is að hópurinn hafi verið í Reykjavík þegar lögregla náði í þá. „Það var rætt við þá og teknar niður upplýsingar um þá, en við getum ekki staðsett nákvæmlega hvar þeir voru,“ segir Fjölnir.

Frétt af mbl.is

Lögreglan á eftir jeppaköllum

Hann segir að hópurinn hafi borið að sér sakir, en að lögreglan sé ekki með nægilega sterk gögn í höndunum til að geta kært þá. Erfitt sé að greina út frá myndum og myndböndum sem birt voru á Facebook hvort athæfi mannanna varði við lög. Þetta mál endaði þess vegna með tiltali og áminningar um hvaða reglur séu í gildi á Íslandi.

„Þetta mál fer ekki lengra í bili, en við erum með allar upplýsingar um þá og við vitum hvert þeir fara næst. Lögreglan fylgist með þeim.“

• Blogga um frétt