Það er af sem áður var þegar flugleiðir í Íslandsflugi skiptu tugum og flogið var á hvert horn. Nú eru fáar leiðir taldar nægilega arðbærar án beinnar niðurgreiðslu úr ríkissjóði.
Í síðastliðnum mánuði var opnað tvískipt útboð Vegagerðarinnar í áætlunarflugi innanlands. Annars vegar voru boðnar út flugleiðirnar á Bíldudal/Gjögur og hins vegar á Höfn í Hornafirði.
Útboðið miðar að því að tryggja samgöngur í lofti og lágmarksfjölda ferða. Heildarkostnaðaráætlun hljómar uppá rúma 1,2 milljarða króna, en þrjú flugfélög buðu í verkin, Flugfélag Austurlands, Flugfélagið Ernir og Norlandair, að því er fram kemur í umfjöllun um mál þetta í Morgunblaðinu í dag.
Athygli vekur að Flugfélag Austurlands (FA) bauð langlægst í verkið eða 60% af heildarkostnaðaráætlun. Félagið er ungt að árum, fékk starfsleyfi í apríl í fyrra og hefur eina fjögurra sæta vél til umráða. Aðspurður um hið lága tilboð segir Kári Kárason, framkvæmdastóri FA: „Við fórum út í þetta á okkar forsendum og þetta er niðurstaðan.“ Hann segir félagið tilbúið til að stækka hratt og hafi tilbúna samninga um kaup eða leigu á viðeigandi flugvélakosti og þjálfun áhafna.