Skáru niður yfirbyggingu og afþökkuðu hærri laun

Starfsmönnum Íslandspósts hefur fækkað um fjórðung síðan endurskipulagning félagsins hófst fyrir ári eftir þungan rekstur árum saman. Birgir Jónsson, forstjóri Íslandspósts, tók við félaginu í maí í fyrra.

Síðan hefur hann meðal annars fækkað stjórnendum um 30%, starfsmönnum í upplýsingatækni um 25% og almennum skrifstofumönnum um 27%. Fyrir vikið hefur starfsfólki fækkað úr 1.060 í 790.

Jafnframt hafa dótturfélög verið seld og fasteignir verið settar í sölu. „Það lætur nærri að við höfum náð að skera kostnað niður um 1.100 milljónir á ári,“ segir Birgir. „Það er gríðarlegur metnaður hjá okkur öllum hjá Póstinum að standa okkur vel í þessu verkefni og sem dæmi afsöluðu lykilstjórnendur Póstsins sér kjarasamningsbundnum launahækkunum nú í vor,“ segir Birgir, en ýtarlegt viðtal við hann birtist í ViðskiptaMogganum í dag.

Hann segir tekjur hafa dregist saman um 500-700 milljónir vegna faraldursins. Óvíst sé hvort þetta sé tekjutilfærsla eða tekjutap. Á hinn bóginn sé stefnt að því að geta senn greitt eigandanum, ríkinu, arð.