Svandís Svavarsdóttir heilbrigðisráðherra tók í kvöld við minnisblaði frá embætti sóttvarnalæknis um hertar aðgerðir á Íslandi vegna kórónuveirunnar. Á morgun tilkynnir hún til hvaða aðgerða verður gripið, daginn áður en stærsta ferðahelgi ársins fer í hönd. Hingað til hefur hún í flestu farið eftir tillögum sóttvarnalæknis.
Óvíst er hvaða aðgerðir ganga í gildi en til umræðu hefur verið að fækka leyfilegum fjölda fólks á samkomum, að tveggja metra reglan verði aftur að formlegri reglu og að breytt fyrirkomulag verði tekið upp á landamærum landsins, meðal annars hugsanlega þannig að ferðamönnum verði einnig gert að viðhafa heimkomusmitgát.
Smit hafa enda verið að berast inn í landið, líklega með erlendum ferðamönnum, telja sóttvarnayfirvöld. Virk smit á Íslandi eru 28 og þar af flest innanlandssmit, sem þó eiga líklega uppruna sinn hjá ferðamönnum.
RÚV sagði frá því í tíufréttum að ráðherra hefði þegar tekið við minnisblaðinu.
Staðgengill sóttvarnalæknis staðfesti við mbl.is fyrr í kvöld að embættið legði til breytingar á ráðstöfunum hér á landi: „Ég, Þórólfur og aðrir sem komum að undirbúningi minnisblaðsins, höfum reynt að skoða málið frá sem flestum hliðum og leggja það til sem við teljum að sé virkilega nauðsynlegt og gangi ekki allt of langt eða svo langt að það skapi einhvern ótta sem ekki er tilefni til,“ sagði Kamilla Sigríður Jósefsdóttir.
Þegar Kamilla var spurð hvort mælt verði gegn því að fólk ferðist um landið um helgina sagði hún: „Við erum kannski ekki á alveg sama stað og um páskana eða teljum okkur ekki vera það, en það er ýmislegt sem er farið yfir í þessu minnisblaði. Það verður svo að koma í ljós hvað ráðherra telur við hæfi að gera,“ segir hún.