Gríðarstórt bjarg blasti við í vegstæði þar sem unnið er að breikkun hringvegarins fyrir neðan Lágafellskirkju í Mosfellsbæ. Skyldi þetta vera álfasteinn?
„Nei, þetta var klöpp sem var þarna og losnaði innan úr miðri skeringu. Þetta var ekki stakur steinn í upphafi leiks,“ segir Magnús Steingrímsson, staðarstjóri verktakans Loftorku Reykjavík ehf., í Morgunblaðinu í dag.
Vegagerðin sendi frá sér tilkynningu í gær um að sprengja þyrfti klöpp sem væri í vegstæðinu og því fylgdi talsvert ónæði fyrir þá sem væru í nágrenninu. Gefin eru hljóðmerki fyrir og eftir sprengingarnar.
Magnús sagði að búið væri að sprengja þarna af og til í um mánuð og þyrfti sjálfsagt að sprengja einn mánuð í viðbót. Misjafnt er hve oft er sprengt á dag, stundum tvisvar og suma daga er ekkert sprengt. Það fer allt eftir því hvernig gengur að bora klöppina. „Þetta er frekar leiðinleg klöpp, hún brotnar illa,“ sagði Magnús.