Skuldarar í betri stöðu en eftir hrun

Sigurður G. Guðjónsson hæstaréttarlögmaður segir félagið Íþöku hafa sem leigusali viljað ganga að ábyrgð Íslandsbanka á leigugreiðslum Íslandshótela vegna hótels í Katrínartúni. Það er stærsta hótel landsins.

Sigurður segir vígstöðu fyrirtækja í skuldavanda hafa styrkst mikið með nýrri lagasetningu.

„Eftir hrunið 2008 var meira hugað að lagasetningu til hagsbóta fyrir kröfuhafa og þeim gert auðvelt að knýja skuldara í þrot. Þannig gat lánardrottinn komið fram gjaldþroti ef skuldari lýsti því ekki formlega yfir að hann gæti greitt skuld sína við viðkomandi lánardrottin þegar hún félli í gjalddaga, eða innan skamms tíma, ef hún var þegar fallin í gjalddaga,“ segir Sigurður í umfjöllun um mál þessi í Morgunblaðinu í dag.