Smit í Eyjum: 75 í sóttkví

Vestmannaeyjar.
Vestmannaeyjar. mbl.is

Einstaklingur búsettur í Vestmannaeyjum hefur greinst með staðfest smit af COVID-19 og er nú kominn í einangrun. Viðkomandi var í sóttkví við greiningu. 75 aðilar eru nú í sóttkví í Vestmannaeyjum. Þetta kemur fram í facebookfærslu lögreglunnar í Vestmannaeyjum.

Mánudaginn 10. ágúst næstkomandi mun Íslensk erfðagreining standa fyrir skimum til að kanna útbreiðslu veirunnar í Vestmannaeyjum. Þeir sem hafa fengið boð eru hvattir til að skrá sig og taka þátt í skimuninni. Þeir sem ekki skrá sig missa sitt pláss. Fólki með flensueinkenni er bent á að mæta ekki í skimunina. 

Þá ítrekar aðgerðastjórn Vestmannaeyja mikilvægi þess að bæjarbúar gæti að eigin smitvörnum.

„Verum dugleg að þvo hendur, notum sprittið óspart og virðum tveggja metra regluna og 100 manna regluna. Aðilar með flensueinkenni eru einnig hvattir til að setja sig í samband við heilsugæsluna í síma 1700 og fá tíma í sýnatöku.“

Eins og greint var frá í gær greindust einstaklingar sem voru gestkomandi í Vestmannaeyjum um verslunarmannahelgina með kórónuveirusmit í kjölfarið. 

mbl.is